World Bank irashaka kugeza amashanyarazi ku miryango miliyoni 300 muri afurika bitarenze 2030

Kuri uyu wa kabiri Tariki ya 5 ugushyingo 2024, ibiganiro biri kubera muri Convention I Kigali birarimbanyije.

Banki y’isi ikaba ishaka kugeza amashanyarazi kuri buri wese muri Afurika nk’uko byagarustweho mu biganiro by’ingenzi kuri uyu munsi wa kabiri w’inama nyafurika y’icyerekezo ku mirasire y’amashanyarazi (Africa Energy Expo Summit) igikomereje kubera muri Kigali Convention Center ku ya 5 Ugushyingo 2024, ku munsi wa kabiri wayo.

Iki kiganiro cyayobowe na Herald Bonnici, washinze HB Advisory, cyagaragaje ibitekerezo bya Laurencia K. Njagi, impuguke mu bijyanye n’amashanyarazi muri Banki y’Isi (World Bank), aho yasobanuraga uburyo gahunda ya ‘Mission 300’ izageza amashanyarazi kuri buri muturage w’ Afurika.

Njagi yagaragaje ko kubona amashanyarazi akwiye kandi yizewe ari ingenzi mu iterambere ry’Afurika. Mu gihe abasaga miliyoni 600 ku mugabane wa Afurika badafite amashanyarazi, yashimangiye ko kubona amashanyarazi ari ingenzi mu mibereho.

***Laurencia K. Njagi, impuguke mu bijyanye n’amashanyarazi muri Bank***i y’Isi.

Yagize ati: “Nta gihugu na kimwe cyateye imbere kidafite amashanyarazi. amashanyarazi ni ngombwa mu burezi, ubuvuzi, n’iterambere ry’ubukungu.”

Binyuze muri gahunda ya Mission 300, Banki y’Isi na Banki Nyafurika itsura amajyambere (AfDB) bafatanyije kugira ngo kugeza amashanyarazi ku miryango miliyoni 300 muri Afurika bitarenze 2030, aho Banki y’Isi yihaye intego yo kugera ku miryango miliyoni 250.

Iyi gahunda irerekana ko kubona amashanyarazi bigomba gufatwa nk’uburenganzira bwa buri wese, aho kuba amahirwe y’abifite gusa, kandi ikeneye inkunga y’ubuyobozi bwa leta, abikorera ku giti cyabo, n’abafatanyabikorwa mu iterambere.

Njagi yagaragaje zimwe mu mbogamizi zikomeye zirimo amikoro make n’ubushake buke bwa politiki, bituma bigorana kugera ku mashanyarazi kuri bose.

Yavuze ko intara y’Afurika y’iburasirazuba n’iy’amajyepfo zonyine zikeneweho asaga miliyari 100 z’amadolari ngo zigerweho n’amashanyarazi.

Ati: “Leta zigomba gufata amashanyarazi nk’ibintu by’ingenzi kuri buri muturage, atari ku bafite ubushobozi gusa.”

Banki y’Isi imaze gushora asaga miliyari 15 z’amadolari muri iyi gahunda mu myaka ine ishize. Ariko kandi, Njagi yavuze ko kugira ngo hiyongereho ishoramari ry’abikorera ari ingenzi mu kuziba iki cyuho cy’amafaranga.

Gahunda ya Mission 300 yagenewe korohereza abashoramari no kubaha inguzanyo iciriritse kugira ngo ibikorwa byabo bibe byifuzwa cyane mu isoko ry’amashanyarazi.

Njagi yashimangiye ko imirasire y’amashanyarazi, by’umwihariko imirasire igendanwa, ari imwe mu nzira izafasha kugera ku baturage bo mu bice bitagerwaho n’amashanyarazi.

Yanashimangiye ko politiki zinoze ari ingenzi kugira ngo ibigo by’amashanyarazi bifatanye neza n’abaturage mu gihe cyose, mu gihe ibigo by’amashanyarazi bigera kuri 40% gusa mu bihugu bya Afurika ari byo bifite ubushobozi bwo kwirwanaho mu gihe kirambye.

Gahunda ya Mission 300 ya Banki y’Isi ifite intego yo gutuma Afurika ibasha kwishimira iterambere rishingiye ku mashanyarazi yizewe kandi adahenze.

Kubera guhuza inkunga, gukomeza politiki nziza, no guteza imbere uruhare rw’abikorera, iyi gahunda izatuma amashanyarazi abasha kugerwaho na buri wese mu mugabane wa Afurika.

43% by’abatuye Afrika nibo badafite amashanyarazi nk’uko byagaragajwe na Banki y’isi , kandi hakaba higanjemo abatuye munsi y’ubutayu bwa sahara u Rwanda rukaba rwarihaye intego ko muri 2030 nta muturage n’umwe uzaba udafite umuriro.