Abasore n’inkumi 443 basoje itorero indangamirwa icyiciro cya 15

Kuri uyu wa kane tariki 14 Kanama 2025, mu kigo gitorezwamo umuco w’ubutore cya Nkumba

habereye umuhango gusoza Itorero Indangamirwa icyiciro cya 15 ryari rimaze iminsi 45 muri iki kigo.

Abasoje iri torero ni urubyiruko rugera kuri 443 rugizwe n’abakobwa 208 ndetse n’abahungu 235. Muri bo, 105 ni abanyeshuri biga mu mahanga, 103 ni abanyeshuri biga mu bigo mpuzamahanga bikorera mu Rwanda, naho 235 ni urubyiruko rwaturutse mu turere twose tw’u Rwanda rwabaye indashyikirwa ku rugerero icyiciro cya 12.

Uyu muhango witabiriwe n’abanyacyubahiro batandukanye barimo Guverineri w’intara y’amajyaruguru, Maurice MUGABOWAGAHUNDE, Minisitiri w’Urubyiruko n’Iterambere ry’Ubuhanzi , Dr UTUMATWISHIMA Jean Nepo Abdallah, Minisitiri w’Ubumwe bw’Abanyarwanda n’Inshingano Mboneragihugu,   Dr. Jean Damascène BIZIMANA, Minisitiri w’intebe akaba n’umushyitsi mukuru , Dr. Justin Nsengiyumva ndetse n’ababyeyi b’abagize itorero indangamirwa icyiciro cya 15.

Mu ijambo Minisitiri w’Ubumwe bw’Abanyarwanda n’Inshingano Mboneragihugu, Dr. Jean Damascène BIZIMANA yagejeje ku bitabiriye uyu muhango, yagarutse ku cyifuzo bahawe n’itorero indangamirwa  icyiciro cya 15, cy’uko buri mwana wese w’umunyarwanda yagombye guhabwa amasomo  n’imyitozo y’ingangamirwa.

Dr. Jean Damascène BIZIMANA yavuze ko ibyo bizashoboka kuko hariho gahunda iteganyijwe yo kongera ubushobozi bw’ Ikigo gitorezwamo umuco w’ubutore cya Nkumba, ariko no mu ntara no mu turere hakazashyirwaho uburyo bwo gutoza intore zacu z’urubyiruko.

Yongeyeho ko Kongera umubare w’intore bizashoboka mu gihe inzego zose za leta, iz’abikorera, amashyirahamwe,koperative, amadini n’amatorero n’izindi nzego nibakomeza gahunda nziza yo gushyira itorero na Ndi umunyarwanda mu igenamigambi rya buri mwaka muri buri rwego.

Mu butumwa bwihariye Minisitiri w’Ubumwe bw’Abanyarwanda n’Inshingano Mboneragihugu yageneye Itorero Indangamirwa icyiciro cya 15, yagize ati :

 “Ntore rero murangije itorero, imyitwarire myiza mwagize, mwagaragaje muri iri torero irabahesha izina ry’ubutwari mu ruhando rw’izindi ntore , ikabahesha ndetse n’ikivugo kivuga ibigwi byanyu. Izina ryanyu ry’ubutore ni indangamiwa. Mutojwe muri icyiciro cya 15, musanze izindi ntore bagenzi banyu batojwe mbere, mubasange mufatanye kubaka u Rwanda. Muzajya mwivuga muti “Ndi indangamirwa mu nkomezamihigo, ndi umuranga w’u Rwanda, ndi ku isonga mu kubaka u Rwanda rushya, nkorana ibakwe mu kurushakira imbuto, nkagira ishyaka ryo kurushakira amaboko.”

Minisitiri w’intebe Dr NSENGIYUMVA Justin wari umushyitsi mukuru , Yashimiye abagize uruhare mu migendekere myiza y’itorero ahera ku babyeyi ku  kuba barafashije abana kwitabira itorero, Minubumwe n’abarimu batanze amasomo. Yashimiye kandi indangamirwa ku myitwarire myiza zagaragaje mu gihe bamaze mu kigo cy’ubutore cya Nkumba.

Dr NSENGIYUMVA Justin yibukije izi ntore ko zigomba kurwana urugamba rwo gutsinda ingeso mbi zikunze kwibasira urubyiruko harimo kwiyandarika ,gukoresha ibiyobyabwenge n’ubusinzi mu rubyiruko, yongeraho ko itorero basoje rikwiriye kuba umwanya mwiza wo kugira ngo buri wese atekereze ku ruhare rwe bwite mu kubaka igihugu azirikana inkingi igihugu cyacu cyubakiyeho zirimo ubukungu, imibereho n’imiyoborere myiza.

Mu butumwa bwihariye Minisitiri w’intebe Dr NSENGIYUMVA Justin wari umushyitsi mukuru yageneye Itorero Indangamirwa icyiciro cya 15, yagize ati :

 “Imbaraga zanyu nk’urubyiruko ni umusingi ukomeye ku hazaza h’icyerekezo cy’u Rwanda.  Mwe nk’abakiri bato mukoreshe umwanya wanyu mu biri ngombwa gusa ,ibibarangaza mu nzira zitandukanye n’amazina atandukanye bihabwa ntimukabihe umwanya. Ndabashimira ko musoje itorero neza , mujyende mube umusemburo w’itorero no gukomeza kongera ubushobozi mu bumenyi butandukanye ku bijyanye no kuzamura imibereho myiza y’abanyarwanda no gushaka ibisubizo ku bibazo bikibangamiye iterambere ry’u Rwanda.”

Muri 443 basoje Itorero Indangamirwa icyiciro cya 15, harimo 13 bari basanzwe batuye mu mahanga batagiraga ibyangombwa by’u Rwanda ,bamaze guhabwa indangamuntu na pasiporo by’u Rwanda.

 Mu kigo gitorezwamo umuco w’ubutore cya Nkumba, hamaze gutorezwa abagera ku 5561.