Goma : MONOSCO yageze I Goma kugenzura uko amasezerano y’agahenge yubahirizwa
Umuyobozi mushya w’ingabo z’umuryango w’abibumbye zishinzwe kubungabunga amahoro muri Repubulika Iharanira Demokarasi ya Congo, James Swan, kuri uyu wa gatanu yageze ku kibuga cy’indege cya Goma mu ruzinduko rw’akazi rugamije gusuzuma uko amasezerano y’amahoro n’agahenge biri kubahirizwa mu burasirazuba bw’icyo gihugu gikomeje guhura n’umutekano mucye.
Uyu munyamerika uyoboye MONUSCO yageze mu mujyi wa Goma, ugenzurwa n’umutwe wa AFC/M23 mu ntara ya Kivu ya Ruguru, mu gihe hari impungenge zikomeje kugarukwaho ku ihonyorwa ry’agahenge hagati ya Leta ya Congo n’uyu mutwe witwaje intwaro.
Amakuru aturuka mu nzego z’umutekano agaragaza ko uru ruzinduko rwa Swan rugamije by’umwihariko kugenzura uko amasezerano yo guhagarika imirwano yashyizweho n’impande zihanganye ari kubahirizwa, ndetse no gutegura uburyo bwo kongera icyizere mu biganiro by’amahoro bikomeje kugorana nk’uko byagarutsweho n’ibinyamakuru bitandukanye.
Byitezwe ko mu gihe ari i Goma, Swan azagirana ibiganiro n’abayobozi ba AFC/M23, mu rwego rwo gushaka ibisubizo ku makuru amaze iminsi avugwa y’ihohoterwa ry’agahenge, ibintu bishobora kongera gukongeza intambara mu karere.
Uyu muyobozi mushya wa MONUSCO ageze i Goma nyuma yo gusura imijyi ya Bunia mu ntara ya Ituri ndetse na Beni, aho yahuye n’abayobozi batandukanye baganiriye ku mutekano n’ibibazo byugarije abaturage muri ibyo bice.
Uru ruzinduko rwe rubaye mu gihe uburasirazuba bwa Repubulika Iharanira Demokarasi ya Congo bukomeje kuba isibaniro ry’imirwano, aho abaturage benshi bakomeje guhunga ingo zabo kubera umutekano mucye n’ukutizerana hagati y’impande zihanganye.
Amahumbezinews.com.
