KIGALI : Abakobwa bakomeje kugira uruhare rukomeye mu kuzamura umusaruro w’uburezi mu Rwanda

Kuri uyu wa kane amanota y’ibizamini bya Leta bisoza icyiciro rusange cy’amashuri yisumbuye, Tronc Commun, yashyizwe hanze maze hagaragara ko umusaruro w’abanyeshuri wiyongereye ku buryo bugaragara, aho 85.7% by’abakoze ibizamini batsinze, mu gihe umwaka ushize bari 64.35%.

Iri zamuka ry’amanota ryaherekejwe n’izindi nkuru zikomeye zivuga ukuntu abakobwa babiri basangiye umwanya wa mbere ku rwego rw’igihugu, naho Akarere ka Kirehe ko kakongera kuza ku isonga mu mitsindire, inshuro ebyiri zikurikiranye.

Leontine Uwamariya wo muri ISF Nyamasheke na Olla Musonga Isimbi wo muri FAWE Girls School mu Karere ka Gasabo, ni bo basangiye umwanya wa mbere ku rwego rw’igihugu muri Tronc Commun.Aho buri wese yagize amanota 98.7%, aya manota akaba yabashyize ku isonga ry’abanyeshuri bakoze neza muri ibi bizamini.

Umwanya wa gatatu wegukanywe na Joel Ganza wo muri Saint Ignatius High School mu Karere ka Gasabo, wagize 98.6%.

Iyi ntsinzi y’aba bakobwa ibaye mu gihe imibare rusange y’uyu mwaka igaragaza ko abakobwa bakoze neza kurusha abahungu.

Abakobwa batsinze kurusha abahungu

Muri uyu mwaka w’amashuri, 89.8% by’abakobwa bakoze Tronc Commun batsinze, mu gihe abahungu batsinze ku kigero cya 82.63%.

Iyi mibare igaragaza ko abakobwa bakomeje kugira uruhare rukomeye mu kuzamura umusaruro w’uburezi mu Rwanda.

Kuba kandi abakobwa babiri ari bo basangiye umwanya wa mbere ku rwego rw’igihugu bitanga indi shusho y’uko abakobwa batari gusa kwitabira amashuri ku bwinshi, ahubwo banagenda barushaho kugaragaza umusaruro ukomeye mu myigire.

Umubare w’abatsinze wazamutseho amanota arenga 21

Ikintu cyagaragaye cyane mu manota y’uyu mwaka ni intera iri hagati y’umusaruro w’umwaka ushize n’uw’uyu mwaka.

Mu mwaka w’amashuri wa 2024/2025, abatsinze Tronc Commun bari 64.35%.

Uyu mwaka, abatsinze bageze kuri 85.7%.

Ni izamuka rya 21.35 percentage points mu mwaka umwe.

Iri zamuka ni rimwe mu makuru akomeye agaragara mu manota yatangajwe, kuko risobanura ko umubare w’abanyeshuri bageze ku rwego rwo gutsinda ibizamini wiyongereye ku buryo bugaragara.

Intsinzi y’uyu mwaka isobanuye iki ku burezi?

Nubwo amanota meza y’abanyeshuri ari inkuru ishimishije ku banyeshuri, ababyeyi n’amashuri, iri zamuka rinatanga umwanya wo kureba ku cyakorwa kugira ngo uyu musaruro ukomeze.

Kongera umubare w’abanyeshuri batsinda ni intambwe ikomeye, ariko uburezi bufite ireme ntibupimirwa ku gutsinda ibizamini gusa.

Ni ngombwa ko abanyeshuri bakomeza guhabwa ubumenyi n’ubushobozi bazakoresha mu cyiciro gikurikiyeho cy’amashuri, mu mashuri y’imyuga n’ubumenyingiro ndetse no mu buzima bwabo bw’akazi.

Ku bakobwa babiri basangiye umwanya wa mbere, amanota 98.7% ni umusaruro w’ubushobozi bwabo kandi ashobora kuba urugero ku bandi banyeshuri, cyane cyane abakobwa, ko gutsinda neza no guhatanira umwanya wa mbere ku rwego rw’igihugu bishoboka.

Abanyeshuri batsinze batangiye indi ntambwe

Ku banyeshuri batsinze Tronc Commun, gutangazwa kw’amanota si iherezo ry’urugendo rwabo rw’uburezi.

Ni intambwe ibafungurira inzira ijya mu cyiciro gikurikiyeho, aho bazakomeza kwagura ubumenyi no guhitamo inzira ijyanye n’ubushobozi bwabo n’ibyo bifuza kuzageraho.

Ku babyeyi n’abarimu, amanota y’uyu mwaka na yo ni umwanya wo gukomeza gushyigikira abanyeshuri no kubafasha kubaka ejo hazaza h’igihugu nk’uko byagiye bigarukwaho kuri uyu munsi na bamwe mu barezi n’umubyeyi w’uwabaye uwa mbere .

Kuva kuri 64.35% kugera kuri 85.7%, abakobwa babiri basangiye umwanya wa mbere, n amanota ya Tronc Commun y’uyu mwaka agaragaza umusaruro mushya mu burezi bw’u Rwanda.

Alice Ingabire