Ibicuruzwa by’u Rwanda byoherezwa mu mahanga byagabanutseho 12.5%

NSR ikigo cy’Igihugu cy’Ibarurishamibare, cyatangaje ko mu gihembwe cya kabiri cy’umwaka wa 2025, agaciro k’ibicuruzwa byose u Rwanda rwohereje mu mahanga cyageze kuri miliyoni 1,735.84 z’amadolari y’Amerika. Bino bikaba bigaragaza ko ubucuruzi bw’ibicuruzwa byoherezwa mu mahanga bwagabanutseho 13% ugereranyije n’igihembwe cya mbere cya 2025.

Muri icyo gihembwe, ibicuruzwa bikomoka mu Rwanda byoherejwe mu mahanga byari bifite agaciro ka miliyoni 346.04 z’Amadolari y’Amerika. Ibicuruzwa byaturutse mu mahanga bikanyuzwa mu Rwanda mbere yo kongera koherezwa hanze byari bifite agaciro ka miliyoni 142.41 z’Amadolari, mu gihe ibicuruzwa byatumijwe mu mahanga byageze kuri miliyoni 1,247.39 z’Amadolari y’Amerika.

NISR ivuga ko ugereranyije n’igihembwe cya kabiri cya 2024, agaciro k’ibicuruzwa bikomoka mu Rwanda byoherejwe mu mahanga kagabanutseho 35.64%. Muri icyo gihembwe cya 2024, ibyo bicuruzwa byari bifite agaciro ka miliyoni 537.64 z’Amadolari, mu gihe mu gihembwe cya kabiri cya 2025 byari miliyoni 346.04 z’Amadolari. Ugereranyije n’igihembwe cya mbere cya 2025, na bwo hagaragaye igabanuka rya 28.03%.

Ku rundi ruhande, ibicuruzwa byose u Rwanda rwatumije mu mahanga mu gihembwe cya kabiri cya 2025 byagabanutseho 20.50% ugereranyije n’igihembwe cya kabiri cya 2024. Ugereranyije n’igihembwe cya mbere cya 2025, ibyo bicuruzwa na byo byagabanutseho 9.55%.

Iki kigo cya NISR kandi cyagaragaje ko ibicuruzwa byaturutse mu mahanga bikanyuzwa mu Rwanda mbere yo kongera koherezwa ahandi byagabanutseho 13.17% mu gihembwe cya kabiri cya 2025, ugereranyije n’igihembwe nk’iki cya 2024. Icyakora, ugereranyije n’igihembwe cya mbere cya 2025, byiyongereyeho 5.19%.

Leta zunze ubumwe z’abarabu hamwe na Repubulika Iharanira Demokarasi ya Congo, u Bushinwa, u Bubiligi ndetse Luxembourg , ni bimwe mu bihugu byakiriye byinshi mu bicuruzwa byoherejwe n’u Rwanda.

Ni mu gihe ibicuruzwa byaturutse mu mahanga bikanyuzwa mu Rwanda mbere yo kongera koherezwa, Repubulika Iharanira Demokarasi ya Congo ni cyo gihugu cyakiriye byinshi, igakurikirwa na Ethiopia, Leta Zunze Ubumwe z’Abarabu, u Burundi n’u Budage.

RDC yonyine yakiriye 94.55% by’ibicuruzwa byanyujijwe mu Rwanda mbere yo koherezwa mu mahanga, bifite agaciro ka miliyoni 54.56 z’Amadolari y’Amerika. Muri ibyo bicuruzwa, ibiribwa n’amatungo mazima ni byo byoherejwe ku bwinshi, bifite agaciro ka miliyoni 51.62 z’Amadolari, bigakurikirwa n’ibikomoka kuri peteroli n’ibindi bicuruzwa bifitanye isano na byo bifite agaciro ka miliyoni 31.94 z’Amadolari.

Raporo ya NISR kandi igaragaza ko u Bushinwa, Tanzania, u Buhinde, Kenya na Leta Zunze Ubumwe z’Abarabu ari byo bihugu bitanu by’ingenzi u Rwanda rwatumijemo ibicuruzwa byinshi mu gihembwe cya kabiri cya 2025. ”Rwandan cultural information”.

amahumbezinews.com