Rwanda: Intambwe ishimishije muri serivise z’ububyaza n’ubwo hacyirimo icyuho

Mu Rwanda, umubare w’ababyaza uracyari muto ugereranyije n’ababyeyi bakeneye serivisi zabo, n’ubwo hari intambwe igaragara imaze guterwa mu myaka ishize.

Icyuho kiracyagaragara mu mwuga w’ububyaza, nk’uko bitangazwa n’Urugaga rw’Abaforomo n’Ababyaza mu Rwanda (RNMU). Nyuma ya Jenoside yakorewe Abatutsi mu 1994, uyu mwuga wongeye kubakwa buhoro buhoro, aho ubu igihugu gifite ababyaza barenga 2,400. Icyakora, uyu mubare nturagera ku kigero gikenewe ngo uhuze n’abaturage bagomba kwitabwaho.

Buri mwaka tariki 5 Gicurasi, u Rwanda rwifatanya n’isi kwizihiza umunsi wahariwe ababyaza, hagamijwe kugaragaza uruhare rukomeye bagira mu buzima bw’ababyeyi n’impinja.

Perezida wa RNMU, André Gitembagara, avuga ko umwuga w’ububyaza wateye imbere cyane ugereranyije n’aho wavuye. Avuga ko uretse kuba umubare warazamutse, n’urwego rw’ubumenyi rw’abawukora rwiyongereye, aho bavuye ku mpamyabumenyi z’icyiciro cya mbere (diploma) bagera no ku masomo yo ku rwego rwa kaminuza (bachelor’s na master’s). Ibi byatumye ireme rya serivisi ritangwa rirushaho kuzamuka.

Nubwo bimeze bityo ariko, ikibazo cy’ibura ry’ababyaza kiracyari ingorabahizi. Mu bigo nderabuzima byinshi, usanga umubyaza umwe cyangwa babiri aribo bakurikirana abaturage bagera ku 15,000. Ibi bibashyira ku gitutu gikomeye, bigatuma bakora amasaha arenga 60 mu cyumweru, nyamara amategeko ateganya amasaha 40, kandi ntibahabwe amafaranga y’ikirenga.

Ikindi kibazo ni imishahara itajyanye n’akazi bakora. Kuva mu 2016, umuforomo ukorera ku kigo nderabuzima ahembwa amafaranga arenga gato ibihumbi 200 Frw ku kwezi. Ibi bituma bamwe mu barangije kwiga batinya kujya gukorera mu bice by’icyaro, cyane ko banahura n’ibiciro by’ingendo bihanitse.

Ku rundi ruhande, Leta y’u Rwanda yatangiye gushaka ibisubizo birambye. Minisiteri y’Ubuzima yashyizeho gahunda igamije kongera umubare w’abakozi bo mu rwego rw’ubuzima binyuze muri gahunda ya “4×4”, igamije gukuba kane abakozi bo kwa muganga bitarenze mu 2028.

Mbere y’iyi gahunda, u Rwanda rwasohoraga ababyaza bagera kuri 72 gusa buri mwaka. Ariko kuva mu 2023, hashyizwemo imbaraga mu kongera amashuri yigisha ububyaza, kongera abarimu n’ibikoresho byo kwimenyereza umwuga, ndetse hanashyirwaho integanyanyigisho imwe ihuriweho. Ibi byatumye umubare w’abinjira muri uyu mwuga ugera ku 1,050 buri mwaka.

Nubwo hari izi mbaraga zose, ikibazo ntikirarangira burundu. Mu mavuriro menshi, umubyaza umwe ashobora kwita ku bagore bagera kuri 20 icyarimwe, mu gihe amabwiriza asaba ko buri mubyeyi uri ku bise aba afite umubyaza umwitaho ku giti cye. Ibi bishobora kugira ingaruka zirimo n’imfu z’ababyeyi n’impinja.

N’ubwo u Rwanda rwageze ku ntambwe ishimishije mu kugabanya imfu z’ababyeyi, zavuye ku kigero cyo hejuru cyane mu myaka 20 ishize, haracyari urugendo rurerure rwo kugera ku rwego rwifuzwa.

Kugeza ubu, umuseke.rw uvuga ko igihugu gifite gahunda yo kongera umubare w’abarangiza mu mashuri y’ubuvuzi, ubuforomo n’ububyaza, bakava ku 2,000 bakagera ku 8,000 buri mwaka. Ibi biteganyijwe kuzafasha kugabanya icyuho kiri mu bakozi bo mu rwego rw’ubuzima no kunoza serivisi zihabwa abaturage.

amahumbezinews.com